تانریمی آپاردی، اؤزونمو گئتدین؟
سنسیزم، یالقیزام، تنهایام داها
تانریمی آپاردی، اؤزونمو گئتدین؟!
خبرین اولدومو باتدین گوناها،
تانریمی آپاردی، اؤزونمو گئتدین؟!
...من عشق دلیسییدیم-سئوداسی سندن،
ایندی آیریلیقسان ساچیمدا دن-دن.
سن اؤزون گلمیشدین، چاغیرمادیم من،
تانریمی آپاردی، اؤزونمو گئتدین؟!
...كؤنول، سنه یئندیم، تك سنه بیل، سن،
آیریلیق اؤلومدن بئتردی بیلسن...
ائی، منی تكلییه تاپشیریب گئدن
تانریمی آپاردی، اؤزونمو گئتدین؟!
وفاسیز یار
سئوگیلیم، سن منی آتیب گئدیرسن،
سئوینجی كدره قاتیب گئدیرسن.
گئت آی وفاسیز، خوشبخت اولگینن
سن منی داش-قاشا ساتیب گئدیرسن.
من سنینچون كئچردیم شیرین جانیمنان
سن منی سایماییب، نئجه گئدیرسن،
گئت ائی وفاسیز یار، دؤنمه گئرییه
شیطان رؤیاسیندا یاتیب گئدیرسن.
ناكام سئوگیم
گؤرمور گؤزلریم سندن باشقا هئچ كسی
كور قویوب منی ناكام سئوگیمین ناله‌سی
داغ چكیر سینه‌مه "اونوت منی" كلمه‌سی
آل بو جانیمی اونسوز كسیلیب آرتیق نفه‌سی
ایزله‌ییر هر آن منی حسرتین قارا كؤلگه‌سی
بئزدیریب گئجه‌لری قلبیمین فریادلی سسی
قوووب یوخولاریمی خیالینا دالماق هوسی
سنسن منیمچون عشقین دیَیشمز قیبله‌سی.
من سنین یولونو گؤزله‌یه‌جم
اللرین الیمه توخونمایینجا
تئللرین تئلیمه قاریشمایینجا
سئوگیلیم بوینوما ساریلمایینجا
من سنین یولونو گؤزله‌یه‌جم
هارایا گئدیرم گؤزلریمده‌سن
دؤیونن قلبیمده سؤزلریمده‌سن
من ایللر ایله گؤزلتسن ده سن
من سنین یولونو گؤزله‌یه‌جم
سنسن یاشادان بو اورگی
سن اولماسان داغیلار دونیام
من همیشه سنین اوچون وفادارام
نه اولار بو سئوگییه قاتما حرام
سنسن یاشادان بو اورگی
سئوگی نه دیر كی، منه قییمادین
ایندی او سئوگیدن هئچنه قالمادی
بو سئوگی منیم اوچون آرتیق یالاندی
سن ایدین یاشادان بو اورگی
من سئوه‌رم ایكیمیزین یئرینه
بو سئوگیدن سن قورخورسان عیبی یوخ،
من سئوه‌رم ایكیمیزین یئرینه
بو عشق اوچون بیر گون دارا چكسه‌لر
من گئده‌رم ایكیمیزین یئرینه
مین عذابدیر سنسیز كئچن هر گونوم،
اونوتموشام یاخشی-یامان فرقینی
بو سئوگی‌نین داغ اریدن دردینی،
من چكرم ایكیمیزین یئرینه
گول دئییرم، گول قلبینه دَ‌ییرم،
من سنینچون تانری یازان شعرم،
دوداقلارین اینجیمه‌سین دئییرم،
من اؤپه‌رم ایكیمیزین یئرین
مین عذابدیر سنسیز كئچن هر گونوم،
اونوتموشام یاخشی-یامان فرقینی
بو سئوگی‌نین داغ اریدن دردینی،
من چكرم ایكیمیزین یئرینه
طالعییمده سون آچیلان گولومسن
سوزوب قارا گؤزلرین كؤنلومسن
بو سئوگی‌نین سونو اگر اؤلومسه،
من اؤله‌رم ایكیمیزین یئرینه
دردیمی
یوخدور سندن اؤزگه كؤنول سیرداشیم،
سوروشا حالیمی، بیله دردیمی.
گؤرمه‌دیم فله‌یین سئوینج پایینی،
منه هدیه‌‌سی ائله دردیمی؟
دونیا چوخلارینا بال دولو پتك،
عومروم آریلارین ”سانجدیغی” چیچك.
ییغدیم قوجاغیما قمی بیر اتك،
یوكله‌دیم بوینوما شله دردیمی.
ائی منی بو قدر توخ گؤرن آدام،
دویمادیم بو درددن، یوخ، گؤرن آدام.
منه سئوینجیمی چوخ گؤرن آدام،
نه اولا چكمكدن اؤله دردیمی.
ائلناره، بو فلك نامرددیر یامان،
مرد اولان ایسته‌مز نامرددن آمان.
دردیم اورگیمی بؤلدویو زامان،
اولا بیر همدمیم، بؤله دردیمی.
آیریلیق
او سون گؤروش، او سون ویدا،
سالیرسانمی منی یادا؟
آیریلاندا بیر الویدا،
سؤیله‌مه‌دیك، سن ده، من ده.
سونو یوخ بو یالانلارین،
آچیلاجاق صاباحلارین،
آیری-آیری دونیالارین،
اینسانیییق، سن ده، من ده.
یازان یازیب یازیمیزی،
كیم چكجك نازیمیزی،
گل بو آیریلیغیمیزی،
قبول ائدك، سن ده، من ده.
سئوگی ناغیلی
اوزون ایللر اؤنجه جاوان اولاندا
تانیدیغیم بیر قیزا وورولدوم یامان
بیلیردیم كی، جانیم، سئوگیلیم ایدی
بیلمیردیم كی، ناغیل ایمیش او زامان.
سن دئمه بو سئوگی بیر ناغیل ایمیش
من اؤزوم-اؤزومو آلدادیرمیشام
بو سئوگی آغلیمی یامانجا آلمیش
آرتیق بو سئوگییله لعنتلنمیشم.
بوتون گونو دالاشیب، بیز باریشیردیق
سحرلر كوسوردوك، آخشام سئویشیردیك
هئچ كیم منه بو قدر درد وئرمه‌میشدی
هئچ كیم اورگیمه تئز گیرمه‌میشدی.
بیلمیرم نه ائتدیم، آیریلدیق بیردن
سوروشورام اونو گلن-گئدندن
لاكین بیر گؤزل گون من تاپسام اونو
سونسوز و مؤهتشم اولاجاق سونو.
سن دئمه بو سئوگی بیر ناغیل ایمیش
من اؤزوم-اؤزومو آلدادیرمیشام
بو سئوگی آغلیمی یامانجا آلمیش
آرتیق بو سئوگییله لعنتلنمیشم.
سن دئمه ناغیلمیش بوتون سئوگیلر
چوخ آغیر اولسا دا، بو حقیقتدیر
اینسانین آغلینی باشیندان آلیر
سئوگی گؤر بیزلری نه گونه سالیر.
