نئجه یاشاییم؟
سنی گؤرمه‌ینده داریخیر قلبیم
دانیشا بیلمیرم توتولور دیلیم
همیشه یولونو گؤزله‌رم گولوم
یارسیز بو یئرلرده نئجه یاشاییم؟
سنسیزلیكده سنی هر آن آنمیشام
بیرلیكده اولاندا خوشبخت اولموشام
سن گئتدین یئنه‌ده تنها قالمیشام
تنها بو یئرلرده نئجه یاشاییم؟
سئویرم سئوگیلیم سن بونا اینان
دیلیم دئیه بیلمز بو سؤزو یالان
سنسیز حیاتیم بیل قارا زیندان
زیندان حیاتیندا نئجه یاشاییم؟
سنسیزلیك حسرتی منی بوغوبدور
باخاندا هر یانا قارا بولوددور
بولودلو حیاتیما قملر یاغیبدیر
قم یاغیشی آلتیندا نئجه یاشاییم؟
سنكی یوخسان یانیمدا
یامان آجی سیزلاییر، كؤنلومده‌كی یارالار.
بو یارالی كؤنولده جانیم، سنی هارایلار.
سینمده‌كی دردلری، یالنیز سئوگین آنلایار.
آغلاماییم نئیله‌ییم، سنكی یوخسان یانیمدا،
قملی گؤزوم آختاریر، سنی دردلی آنیمدا.
گل اوز-اوزه دوراق بیز، باخ گؤزومده كدره.
بیرجه كلمه سؤزونله، دؤنر جوشان سئللره،
نه اولار گل اللر چك، قریبسه‌ین تئللره،
آغلاماییم نئیله‌ییم، سنكی، یوخسان یانیمدا،
قملی گؤزوم آختاریر، سنی دردلی آنیمدا.
سون دفعه گؤروشنده، كدرله آیریلمادیق،
منجه سئوگی یولوندا، بیز هئچده یانیلمادیق،
آیریلیقدا اوشودوك، نه‌دندیر آنلامادیق،
آغلاماییم نئیله‌ییم سنكی، یوخسان یانیمدا،
قملی گؤزوم آختاریر، سنی دردلی آنیمدا.
“پروان”نین قلبینی، كیمسه یوخ سن بیلیرسن.
بیلیرسن یارالییام، ائله سوال وئریرسن،
گؤزلرین كدرلیدیر، نییه تئز-تئز دئییرسن؟
گؤزلر نئجه گولسون بس، سنكی یوخسان یانیمدا،
قملی گؤزوم آختاریر، سنی دردلی آنیمدا.
سن گئدندن آرتیق نئچه ایل كئچیب
هله ده اؤزومه گلمه‌میشم من
قلبیمه آدینی نئجه یازمیشام،
ائله ده قالیبدی، سیلمه‌میشم من.
سن گئتمك ایسته‌دین، من قوجاقلادیم
"گئتمه، یالواریرام" دئییب ساخلادیم
یادیندامی او گون نئجه آغلادیم؟
او زاماندان بری، گولمه‌میشم من.
هز آلیردین منی اله سالماقدان
ایچیمدن سیرریمی بیر-بیر آلماقدان
دئینده "قورخورام تنها قالماقدان"
قورورلا دئییردین "اؤلمه‌میشم من".
گئدیرسن گئت
داها سنه یالوارمیرام،
گئدیرسن گئت، قالیرسان قال.
آرخانجا سو تك آخمیرام،
گئدیرسن گئت، قالیرسان قال.
اگر منی سئومیرسنسه،
درد-سریمی بؤلمورسنسه،
اگر منسیز اؤلمورسنسه،
گئدیرسن گئت، قالیرسان قال.
یالان عشقین نه فایداسی،
آغلاماق گؤزون قایداسی.
هئچ نه دیَیشمز، قاداسی،
گئدیرسن گئت، قالیرسان قال.
لاقئیدلیكله منی یاخما،
اورگیمی بئله سیخما.
گؤزلریمده یاشا باخما،
گئدیرسن گئت، قالیرسان قال.
بولاق كیمی قایناما، گل،
اورك آدلی آیناما گل.
طالعییمله اویناما گل.
گئدیرسن گئت، قالیرسان قال.
بو نه جور سئوگیدیر، بو نه جور عشقدیر؟
هله باشلامامیش سونو گؤرونور.
سنی سندن آیری دوشونن زامان
قلبیم پارچالانیب یوزه بؤلونور.
بو اورك بیر داها اؤزونه گلمز
حیات اونا آغیر ضربه ووروبدور
منی وورماق اوچون او گؤزللیگین
حیاتین الینده سلاح اولوبدور.
اگر مندن آیری گزسن بیر زامان
بو قملی گؤزلریم یاشلا دولاجاق
سئوگینه قلبیمده قوردوغوم سارای
ائله همین آندا ویران اولاجاق
بلكه‌ده بو سئوگی بیر طرفلیدیر
بلكه‌ده سن منی هئچ سئومه‌ییرسن
هر دقیقه سنین اوچون ووران قلبیمین
بلكه‌ده آغریسین حیسس ائتمه‌ییرسن
نئیله‌یك بیزیم كی، بورا قدرمیش
بؤیوك سئوگیلرین سونو كدرمیش،
نیسگیل حیاتیما ساكیت گلن یار،
بیر گون بو حیاتدان ساكیت گئدرمیش.
گؤرورسنمی؟ حیات چوخ قریبه‌دیر؟
حاقی حاقسیزلیقدا گوناهلاندیریر.
بیلمیرم هئچ منیم گوناهیم نه دیر؟
حیات منی بئله جزالاندیریر.
سنه قارشی اولان بؤیوك حیسسلریم،
حیاتدا ایكینجی محبتیمدیر.
اونو عذابلارلا چتین اونوتدوم،
سنی ایسه اونوتماق داها چتیندیر.
سئوه‌رم سنی
گؤیده یاغیش اولوب یاغسان قلبیمه،
پارلاق گونش اولوب ساچسان قلبیمه،
سرین بولاق اولون آخسان قلبیمه،
قلبیمین آیناسی بیله‌رم سنی،
اولكی تك ایستر، سئوه‌رم سنی.
دونوب گلسن، یئنه سئوسن نه اولار؟
اولدوزوم، آییمسان دئسن نه اولار؟
اورگینی بؤلوب وئرسن نه اولار؟
یالواریب تانریدان دیله‌رم سنی،
اولكی تك ایستر، سئوه‌رم سنی.
اومود وئریب منه، دؤنه‌جم دئسن ،
گلنده گؤزوندن اؤپه‌جم دئسن،
سنی عومروم بویو سئوه‌جم دئسن،
همیشه یانیمدا بیله‌رم سنی،
اولكی تك ایستر، سئوه‌رم سنی.
ایچیمی یاندیریب، باخسان گؤزومو،
دردیندن اؤلورم، دئسن اوزومه.
دؤزه‌رم وئردیگین عذابا، ظلمه،
عومرومون معناسی بیله‌رم سنی،
اولكی تك ایستر، سئوه‌رم سنی.
آیلی بیر گئجه‌ده توتسان ائلیمی،
اودلو آتش كیمی یاخسان ایچیمی،
ووران اورگیمین دویسان سسینی،
قلبیمین آیناسی بیله‌رم سنی
اولكی تك ایستر، سئوه‌رم سنی.
باغیشلا منی
گوناهیم سئومكدیرسه باغیشلا منی
بیر گون ترك ائده‌رم گولوم، من سنی.
اولموشام عشقیندن من آرتیق دلی
گوناهیم سئومكدیرسه باغیشلا منی!
عشقیندیر حیاتدا یاشادان منی،
عشقسیز اینسانین نه دردی قمی؟
اولموشام عشقی‌نین بو گون اسیری
باغیشلا سئوگیلیم باغیشلا منی!
گول تك قوینوندا سارالیب سولدوم
بو عشق یولوندا من هلاك اولدوم.
سنی سئوركن سئویلمز اولدوم
باغیشلا سئوگیلیم باغیشلا منی!
گونش تك قلبیمه نور اله‌دین سن
گؤیلرده سایریشان بیر اولدوزام من.
قلبینده آجی تك یاشاییرام من
باغیشلا سئوگیلیم باغیشلا منی!
سنه وورولان او گوندن بری
یاشاییر قلبیمده هیجران قمی
چاتیب سئوگیمیزین آیریلیق دمی
باغیشلا سئوگیلیم باغیشلا منی!
محبت
محبت عومرون هر بیر آنیندا
اونونلا یاشامیش اورك قانیندا
اینسانا گتیرمیش سئوینج و كدر
آیریلیق دؤنوكلوك ایستیین قدر
محبت وطنه آتا آنایا
نادینج اوشاقلارا كؤرپه بالایا
یاخین قوهوملارا دوغما قارداشا
حقیقی صمیمی دوستا سیرداشا
محبت دایمی اولوی سئوگییه
هر بیر عائله‌‌ده مؤحكم بیرلییه
یاشیل مئشه‌لره داغ یایلاقلارا
سولاری شفالی بوز بولاقلارا
محبت زحمتكئش هر بیر اینسانا
فحله‌یه كندلییه تمیز ویجدانا
عالیمه طبیبه علمی قانانا
مئمارا بننایا دایم قورآنا
محبت شاعره صمیمی سؤزه
اوخویان بولبوله هر گولن گؤزه
سحرلر آچیلان تزه تر گوله
كؤنلومو اوخشویان شیرین بیر دیله
محبت اینسانین چتین گونونده
اونا دایاق اولموش توی دویونوندو
اینسانین حیاتی بیر افسانه‌دیر
محبت سیز عومور بیر ویرانه‌دیر
سنی یاد اللره وئرن دئییلم
موباریز اولموشام سنی سئوندن،
سندن اؤزگه‌سینی سئون دئییلم.
سن یالنیز منیمسن بیر عومور قدر،
سنی یاد اللره وئرن دئییلم.
سنه هر دقیقه زنگ ائده‌جه‌یم،
هاردا اولدوغونو اؤیرنه‌جه‌یم.
سنی اولكیندن چوخ سئوه‌جه‌یم،
سنی یاد اللره وئرن دئییلم.
قویمارام بیر اؤزگه گؤز باخسین سنه،
اونلار دیَمز عشقین بیر ذره‌سینه.
هر زامان صادق اول عشقینه، منه،
سنی یاد اللره وئرن دئییلم.
عشقیندن اریگیب، دؤنسم ده سئله،
حسرتدن جان وئریب، اؤلسم ده بئله.
بیر شمتك اریگیب، سؤنسم ده بئله،
سنی یاد اللره وئرن دئییلم.
قوردوغوم خیاللار گئرچك اولاجاق،
گونش اوستوموزه شفق ساچاجاق.
هیجرانین یولونا سون قویولاجاق،
سنی یاد اللره وئرن دئییلم.
آنانی اؤزومه آنام بیله‌جم،
اینان كی، آتانی لاپ چوخ سئوه‌جم.
سیزینله سئوینیب، سیزله گوله‌جم،
سنی یاد اللره وئرن دئییلم.
بیلیرم، آنان دا منی سئوه‌جك،
او گوندن اؤزونه قیزی بیله‌جك.
پروانه دئدیگین بیل كی، ائده‌جك،
سنی یاد اللره وئرن دئییلم
