عشقی-شیكایت
كولكلر حسرتی گتیردی منه،
بیر یارپاق میثالی تیترگیر قلبیم.
گؤزلریم باخدیقجا اؤتوب كئچنه،
قانادیم قیریلیر، قالماییر صبریم.
باهار چیچكلرله عومور بزه‌ییر،
من نییه بو قدر چیركین قالمیشام؟
سئوگینی بیلمه‌ین گزیب ایله‌نیر،
اینتیظار اودویلا صاباحلامیشام
بو شعر، میصراعلار قلبیمین سسی،
بو سسه بیر جاواب وئرمك اولارمی؟
یوللاریم بیتیبدیر، چاره قالماییب،
عونوانسیز منزیله گئتمك اولارمی؟
عشقی-شیكایت
كولكلر حسرتی گتیردی منه،
بیر یارپاق میثالی تیترگیر قلبیم.
گؤزلریم باخدیقجا اؤتوب كئچنه،
قانادیم قیریلیر، قالماییر صبریم.
باهار چیچكلرله عومور بزه‌ییر،
من نییه بو قدر چیركین قالمیشام؟
سئوگینی بیلمه‌ین گزیب ایله‌نیر،
اینتیظار اودویلا صاباحلامیشام
بو شعر، میصراعلار قلبیمین سسی،
بو سسه بیر جاواب وئرمك اولارمی؟
یوللاریم بیتیبدیر، چاره قالماییب،
عونوانسیز منزیله گئتمك اولارمی؟
سن گئدندن آرتیق نئچه ایل كئچیب
هله ده اؤزومه گلمه‌میشم من
قلبیمه آدینی نئجه یازمیشام،
ائله ده قالیبدی، سیلمه‌میشم من.
سن گئتمك ایسته‌دین، من قوجاقلادیم
"گئتمه، یالواریرام" دئییب ساخلادیم
یادیندامی او گون نئجه آغلادیم؟
او زاماندان بری، گولمه‌میشم من.
هز آلیردین منی اله سالماقدان
ایچیمدن سیرریمی بیر-بیر آلماقدان
دئینده "قورخورام تنها قالماقدان"
قورورلا دئییردین "اؤلمه‌میشم من".
گئدیرسن گئت
داها سنه یالوارمیرام،
گئدیرسن گئت، قالیرسان قال.
آرخانجا سو تك آخمیرام،
گئدیرسن گئت، قالیرسان قال.
اگر منی سئومیرسنسه،
درد-سریمی بؤلمورسنسه،
اگر منسیز اؤلمورسنسه،
گئدیرسن گئت، قالیرسان قال.
یالان عشقین نه فایداسی،
آغلاماق گؤزون قایداسی.
هئچ نه دیَیشمز، قاداسی،
گئدیرسن گئت، قالیرسان قال.
لاقئیدلیكله منی یاخما،
اورگیمی بئله سیخما.
گؤزلریمده یاشا باخما،
گئدیرسن گئت، قالیرسان قال.
بولاق كیمی قایناما، گل،
اورك آدلی آیناما گل.
طالعییمله اویناما گل.
گئدیرسن گئت، قالیرسان قال.
بو نه جور سئوگیدیر، بو نه جور عشقدیر؟
هله باشلامامیش سونو گؤرونور.
سنی سندن آیری دوشونن زامان
قلبیم پارچالانیب یوزه بؤلونور.
بو اورك بیر داها اؤزونه گلمز
حیات اونا آغیر ضربه ووروبدور
منی وورماق اوچون او گؤزللیگین
حیاتین الینده سلاح اولوبدور.
اگر مندن آیری گزسن بیر زامان
بو قملی گؤزلریم یاشلا دولاجاق
سئوگینه قلبیمده قوردوغوم سارای
ائله همین آندا ویران اولاجاق
بلكه‌ده بو سئوگی بیر طرفلیدیر
بلكه‌ده سن منی هئچ سئومه‌ییرسن
هر دقیقه سنین اوچون ووران قلبیمین
بلكه‌ده آغریسین حیسس ائتمه‌ییرسن
نئیله‌یك بیزیم كی، بورا قدرمیش
بؤیوك سئوگیلرین سونو كدرمیش،
نیسگیل حیاتیما ساكیت گلن یار،
بیر گون بو حیاتدان ساكیت گئدرمیش.
گؤرورسنمی؟ حیات چوخ قریبه‌دیر؟
حاقی حاقسیزلیقدا گوناهلاندیریر.
بیلمیرم هئچ منیم گوناهیم نه دیر؟
حیات منی بئله جزالاندیریر.
سنه قارشی اولان بؤیوك حیسسلریم،
حیاتدا ایكینجی محبتیمدیر.
اونو عذابلارلا چتین اونوتدوم،
سنی ایسه اونوتماق داها چتیندیر.
ناكام سئوگیم
گؤرمور گؤزلریم سندن باشقا هئچ كسی
كور قویوب منی ناكام سئوگیمین ناله‌سی
داغ چكیر سینه‌مه "اونوت منی" كلمه‌سی
آل بو جانیمی اونسوز كسیلیب آرتیق نفه‌سی
ایزله‌ییر هر آن منی حسرتین قارا كؤلگه‌سی
بئزدیریب گئجه‌لری قلبیمین فریادلی سسی
قوووب یوخولاریمی خیالینا دالماق هوسی
سنسن منیمچون عشقین دیَیشمز قیبله‌سی.
من سنین یولونو گؤزله‌یه‌جم
اللرین الیمه توخونمایینجا
تئللرین تئلیمه قاریشمایینجا
سئوگیلیم بوینوما ساریلمایینجا
من سنین یولونو گؤزله‌یه‌جم
هارایا گئدیرم گؤزلریمده‌سن
دؤیونن قلبیمده سؤزلریمده‌سن
من ایللر ایله گؤزلتسن ده سن
من سنین یولونو گؤزله‌یه‌جم
دردیمی
یوخدور سندن اؤزگه كؤنول سیرداشیم،
سوروشا حالیمی، بیله دردیمی.
گؤرمه‌دیم فله‌یین سئوینج پایینی،
منه هدیه‌‌سی ائله دردیمی؟
دونیا چوخلارینا بال دولو پتك،
عومروم آریلارین ”سانجدیغی” چیچك.
ییغدیم قوجاغیما قمی بیر اتك،
یوكله‌دیم بوینوما شله دردیمی.
ائی منی بو قدر توخ گؤرن آدام،
دویمادیم بو درددن، یوخ، گؤرن آدام.
منه سئوینجیمی چوخ گؤرن آدام،
نه اولا چكمكدن اؤله دردیمی.
ائلناره، بو فلك نامرددیر یامان،
مرد اولان ایسته‌مز نامرددن آمان.
دردیم اورگیمی بؤلدویو زامان،
اولا بیر همدمیم، بؤله دردیمی.
شیرین یوخو
ایلاهی، بیر شیرین یوخو وئر منه،
ائله بیر یوخو كی، بیر عومور یاتیم.
اوچوب آرزولارین قانادلاریندا،
وصال منزیلینه بیر آندا چاتیم.
منه بیر یوخو وئر، یوخو وئر الله،
اینتیظار، گؤز یاشی قیسمت اولماسین.
اوندا سئوگی اولسون، محبت اولسون،
آیریلیق اولماسین، حسرت اولماسین.
ائله بیر یوخو كی، اونون الییله،
فله‌یین جؤورونو ایتیره بیلیم.
منه یوخو وئرسن، واخت دا وئر الله،
گؤردویوم یوخومو بیتیره بیلیم.
