حسرت
هارا گئدیر بۇ یوْلون سوْنو بیلمیرم
هارا سۆروكله‌ییر بۇ سئودا بیزی
من سنده اۇزاقدا گؤزلریم یوْلدا
سن ده مندن آیری مندن خبرسیز
خاطیریمدن چێخمیر خیالین بیر آن
قلبیمده سیلینمز ایز بۇراخمیسان
منی آیریلیغین یاندیردی یاخدی
دۆباره اۆستدن حسرتین قدرسیز
نه من منم، نه سن سنسن...
بو سئوگی‌نین حسرتیندن
ساچلاریما دوشن دنسن.
یئتممیرم هارایینا،
داغ باشیندا دومان، چنسن.
عشق بیر دریا من ده قاییق.
هئی اوزورم آییق-ساییق،
بیز كی اؤزگه بیر دونیاییق،
نه من صنم، نه سن منسن.
نه او عشقدن بیر قالدی،
سانما كی، بو او وصالدی،
ایللر بیزی آیری سالدی،
نه من منم، نه سن سنسن...
هارداسان
یامان داریخیرام یامان سنینچون
سؤیله منیم گولوم سؤیله هارداسان
سن منه گركسن یانیمدا یوخسان
میرواریم گؤوهریم لعلیم هارداسان ؟
سن ظلمت دونیاما نورسان ایشیقسان
كاسیب اوست-باشیما زر-یاراشیقسان
دیلیمه گوج وئرن نیطق دانیشیقسان
جومله‌ده موبتدام فئلیم هارداسان ؟
اللریم الینسیز بوزا دؤنوبدور
یئدیگیم زهره دوزا دؤنوبدور
ائویم بیر خرابه كوزه دؤنوبدور
جئیرانیم جویوروم قوزوم هارداسان ؟
سنسیز ویرانه‌دیر بو شهر منه
سوسوز چؤل-صحرادیر بو دونیا منه
سن اولسان گوج گلمز بیر كیمسه منه
قولومون قوتی گوجوم هارداسان ؟
شام اولایدیم كاش سنینچون یانایدیم
خیالیندا اعتبارلی عاشق كیمی قالایدیم
ایستمیرم تنها قالیب خیاللارا دالایدیم
سن قوشا وارلیغیم جوتوم هارداسان ؟
چوخدور بو دونیادا چوخدور اینسانلار
عاقیل اولوب یاخشی-پیسی قانانلار
بیر-بیریندن كئف-احوالین سورانلار
دوستوم آرخام منیم پیریم هارداسان ؟
گؤزلری‌نین قاراسیندان اؤپه‌رم
سن اولماسان گول-چیچك تك سولارام
بیر یئزیده بیر گاوورا دؤنه‌رم
آلاهیم-ایمانیم دینیم هارداسان ؟
سئیمورام شاهیدسن سونسوز سئوگیمه
چوخلاری حئیراندیر تمیز عشقیمه
آدینی یازمیشام گیزلی قلبیمه
ائی ایسمی-پونهانیم سیرریم هارداسان ؟
بیلیرسن سنسیز نئجه داریخیرام ؟
نئچه واختی سنی گؤرمور گؤزلریم،
بیلیرسن سنسیز نئجه داریخیرام؟
سن یوخسان معناسیز اولوب سؤزلریم،
حسرتیندن آلوولانیب یانمیشام،
بیلیرسن سنسیز نئجه داریخیرام؟
فیكریمده، خیالیمدا، رؤیامداسان
باشقاسی‌نین یوخ، منیم دونیامداسان.
منیم واریم، دؤولتیم، حیاتیمسان.
سنسیز اؤلویم آرتیق یاشامیرام،
بیلیرسن سنسیز نئجه داریخیرام؟
گولمور اوزوم، آغلار گؤزوم، ائی كؤنول
یوخلوغونا نتر دؤزوم ائی كؤنول؟
من آزمیشام ایتیب ایزیم ائی كؤنول
سن نییه یانیمدا یوخسان هارداسان؟
بیلیرسن سنسیز نئجه داریخیرام؟
یازدی بو شعری گؤزلری نملی
گوندوز چوخ فیكیرلی، اورگی قملی.
من مجنون اولموشام سنده‌كی لئیلی
عشقده تك باشیما تنها قالمیشام،
بیلیرسن سنسیز نئجه داریخیرام؟
آرديني اوخو
بو گئجه رؤیاما قوناق گل، گولوم،
منی سئویب - اوخشا، آل آغوشونا.
بو گئجه رؤیاما قوناق گل، گولوم،
حسرتم سسینه، بیر باخیشینا.
بو گئجه رؤیاما قوناق گل، گولوم،
روحونو روحومون یانینا گؤندر.
حیاتدا نه قدر ائتسن ده ظولوم،
باری رؤیامی سن ناغیلا دؤندر.
بو گئجه رؤیاما قوناق گل، گولوم،
حسرت بیر گئجه‌لیك بیتسین رؤیادا.
بیزدن اوزاق اولسون آیریلیق، اؤلوم،
اونلاری گل قویاق اویاق دونیادا.
بو گئجه رؤیاما قوناق گل، گولوم،
سنسیز رؤیالاریم توتقون، قاریشیق.
بو گئجه رؤیاما قوناق گل، گولوم،
بیز كی رؤیالاردا آیریلمامیشیق.
بو گئجه رؤیاما قوناق گل، گولوم،
داها سنسیزلییه دایانمارام من.
بو گئجه رؤیاما قوناق گل، گولوم،
گلسن، سؤز وئریرم: اویانمارام من...
آرديني اوخو
