سئویرم ایلك عشقیم سئویرم سنی
بیر یئرین آغریسا آغرییار جانیم،
ائی منیم داماردا آخان بو قانیم.
سنی سئودیگیمی دئ نئجه دانیم،
سئویرم ایلك عشقیم سئویرم سنی.
سنی سئومك اوچون یارانمیشام من،
سنی هر دقیقه بیل آنمیشام من.
دونیایا جاهانا سس سالمیشام من،
سئویرم ایلك عشقیم سئویرم سنی.
اونوتسان سن منی گور قازارام من،
اگر چیخیب گئتسن تئز آزارام من.
داغلارا داشلارا بیل یازارام من،
سئویرم ایلك عشقیم سئویرم سنی.
آغاجلار باش اییر منیم سئوگیمه،
عشقلر چاتا بیلمز منیم عشقیمه.
هر زامان دئیه‌جم سالیب دیلیمه،
سئویرم ایلك عشقیم سئویرم سنی.
چاتسا دا سئوگیمیز بیر گون بیل سونا،
قویمارام ایلك سئوگیم كول اولوب یانا.
آیریلان زامانی دئیه‌جم اونا،
سئویرم ایلك عشقیم سئویرم سنی.
یادلار آرا وورسا بیل سئویرم من،
گؤزون گؤزلریمده چوخ خوشبختم من.
اؤلورم گؤر یئنه نه دئییرم من،
سئویرم ایلك عشقیم سئویرم سنی .
آرديني اوخو
عومرومه
داها شاختا منی دوندوران دئییل
گؤردویوم بو بوران او بوران دئییل
باهارا بیر داها یالواران دئییل
نه قدر قار یاغیر یاغسین عومرومه.
عومور وفا وئریر هیجران گیزله‌ییر
اورك گیلئی ائدیر عاغیل دینله‌ییر
كیم كی فاجعه‌لی بیر فیلم ایسته‌ییر
گلیب اؤن سیرادا باخسین عومرومه.
حیات بیر اویوندور سئوگی اویونجاق
كیم دئییر اودوزان سونرا اوداجاق؟
اللهدان دیله‌ییم بودور كی آنجاق
مومكونسه بیر اونو یازسین عومرومه.
گؤزومون یاشینی سیلمه‌یه‌جكسه
اوزومه سئوگییله گولمه‌یه‌جكسه
منیم سئودیگیمتك سئومه‌یه‌جكسه
چاغیرین بیر گولله چاخسین عومرومه.
آرديني اوخو
