بیر گون
سنه اورگیمی آچا بیلمه‌سم،
پاییز باخیشیمدان یاغیش سئللنر.
سیرریمی، سؤزومو سؤیله‌سم سنه،
یاغیش گؤزلرینده باهار دیللنر.
اگر گؤزلرینه باخا بیلمه‌سم،
او دلی كولكلر هارای قوپارار.
سندن اوزاقلاردا اولسام دا گولوم،
شیمشكلر سسیمی سنه آپارار.
بیر گون بولود اورگیندن كئچه‌رم،
بیر گون سنین گؤزلرینه كؤچه‌رم،
اوزومو سؤیكییب گؤیون اوزونه،
بیر گون ساچلارینا سیغال چكرم
قوشولوب بیر دفعه آغ گؤیرچینه،
گؤیلردن یانینا گله‌رم سنین.
گؤزومده سئللنر آرزو یاغیشی،
بیر گون گؤزلرینده گوله‌رم سنین.
آرديني اوخو
سن منیمسن، من ده سنین
بیز سؤز وئریب عهد ائتمیشیك،
سن منیمسن، من ده سنین.
بو سئوگییه آند ایچمیشیك،
سن منیمسن، من ده سنین.
بیر گونشسن طالعییمده،
بیر اومیدسن دیله‌ییمده.
یازیلیبدیر اورگیمده:
سن منیمسن، من ده سنین.
سنسن آرزوم، ایسته‌ییم ده،
صاباحیم، گله‌جه‌ییم ده.
پیچیلداییر اورگیم ده:
سن منیمسن، من ده سنین.
هیجران گلیر، سینانیرام،
حسرتینله هئی یانیرام.
گولوم، سنه اینانیرام،
سن منیمسن، من ده سنین.
عشقیم، سن ده مندن دویما،
باشقا بیریسینه اویما.
منی سنسیزلیكده قویما،
سن منیمسن، من ده سنین.
گؤر نه دئییر دلی اورك،
بیر یئرده آغلایاق، گولك.
او گون اولسون دئیه بیلك:
سن منیمسن، من ده سنین
آرديني اوخو
سئوگی
سنه دئییبلر كی، او سنی سئومیر.
اوزوندن، گؤزوندن اوخونمور سئوگی
آنچاق بونو دئین هئچ اؤزو بیلمیر
نه دیر صاف محبت ابدی سئوگی
سئوگی دیلده دئییل، هئی سؤیله‌یه‌سن
سئوگی گؤزده دئییل، گؤز سوزدوره‌سن
سئوگی اوركده‌دیر، گرك سئونده
هر كسدن گیزلیجه پونهان سئوه‌سن
آرديني اوخو
دوشوندوم یاخینسان، بیر نفس كیمی،
سویوق بیر سسسیزلیك بوغور عشقیمی.
من سنی سئومه‌دیم بیر هوس كیمی،
بلكه ده سنسیزلیك بوغور عشقیمی.
عشقینله آلیشدیم، عشقینله یاندیم،
من آلوو، سن ایسه بیر كولوم اولدون.
عومورلوك سئودایا سنله ایناندیم،
كؤنول باخچامداكی بیر گولوم اولدون.
من سنی سئویرم،دونیالار قدر،
اما قازاندیغیم سنسیزلیگیمدیر.
سنسه قلبینی یوخ، وئریرسن كدر،
اؤلوموم یاتاغدا سسسیزلیگیمدیر.
گؤزلریم اؤنونده ظلمت قارانلیق،
خیالدا اؤپورم یاناغلاریندان.
گؤزلریم قارالدی، اؤلدوم بیر آنلیق،
چونكی اؤپموش ایدیم دوداغلاریندان.
عشقینله یاشارام، اؤلوم نه دیر كی،
مزاریم اوستونده سن آغلا آنجاق.
اؤله‌رم سنینله، گولوم، نه دیر كی،
سئوگیم روحومدادیر،یوخ اولمایاجاق.
محبت اینسانین وارلیغی، اؤزو،
اونسوز یاشاماغین معناسی یوخدور.
محبت كؤنلومون ان شیرین سؤزو،
بو كؤنلون آیری بیر دونیاسی یوخدور.
اونوتما، سئوگیلیم، سئوگی گركدیر،
اینسانین حیاتدا وار اولماغینا.
او بیر فیرتینادیر، دلی كولكدیر،
داها اینانمیرام یار اولماغینا.
آرديني اوخو
آغلاما دئدیمسه، آغلاتدین منی،
نه اولدو بیتیردین اؤجا سئوگینی؟
منی آغلار قویدون، اؤلدوردون منی
منسیز حیاتیندا دئ خوشبختمیسن؟
منه اینانمادین دایم یوخلادین،
سئوگیمی سایمادین، قورورا قاندین
امین اول سؤزوندن، دئمه آلداندین
منسیز حیاتیندا دئ خوشبختمیسن؟
بو حیات اوزومه گولمه‌دی هئچ واخت
همیشه سیندیردی، یوخ ائتدی حیات
دئ منسیز اولدونمو سن ایندی راحت؟
منسیز حیاتیندا دئ خوشبختمیسن؟
سئوگیدن اؤجادیر قورورون سنین.
نه قدر عومرو وار سنین حیسسی‌نین؟
قییمتی یوخمودور منه سئوگی‌نین؟
منسیز حیاتیندا دئ خوشبختسنمی؟
آخیر كی آنلادیم هئچم من سنه،
صاحب اولاممادیم سنین سئوگینه
منیم سوالیما جاواب وئرسنه،
منسیز حیاتیندا دئ خوشبختسنمی؟
آرديني اوخو
سنسیز آچیلاجاق یئنه سحرلر،
گونش سنسیز دوغوب، سنسیز باتاجاق.
گزیب دولاشدیغیم گؤزل شهرلر،
منه تكجه سنی خاتیرلاداجاق.
باخدیغیم بوتون عشق فیلملرینده،
سنی گؤره‌جه‌یم قهرمان كیمی.
اله قلم آلیب گونون بیرینده،
یازاجاغام سنی بیر رومان كیمی.
بیزیم بو داغلارا دوشنده ایلك قار،
اورگیم سنسیز لاپ برك اوشویه‌جك.
آییراجاق بیزی ایكیجه دیوار،
بیر ده آراداكی او بومبوز كولك...
بیلدیگیم یوزلرله آدلار ایچینده،
كؤنلومده ان دوغما آد اولاجاقسان.
تانیشلار، اؤزگه‌لر، یادلار ایشینده،
سن منه ان اوزاق، یاد اولاجاقسان.
بوتون شعرلرده هئی دؤنه-دؤنه،
بیل كی تكجه سنی سسله‌یه‌جه‌یم.
گلمه‌یه‌جه‌یینی بیلسم ده، یئنه
حسرتله یولونو گؤزله‌یه‌جه‌یم.
سنسیز آچیلاجاق یئنه سحرلر،
گونش سنسیز دوغوب، سنسیز باتاجاق.
گزیب دولاشدیغیم بوتون شهرلر،
منه تكجه سنی خاتیرلاداجاق...
آرديني اوخو
بیلیرسن سنسیز نئجه داریخیرام ؟
نئچه واختی سنی گؤرمور گؤزلریم،
بیلیرسن سنسیز نئجه داریخیرام؟
سن یوخسان معناسیز اولوب سؤزلریم،
حسرتیندن آلوولانیب یانمیشام،
بیلیرسن سنسیز نئجه داریخیرام؟
فیكریمده، خیالیمدا، رؤیامداسان
باشقاسی‌نین یوخ، منیم دونیامداسان.
منیم واریم، دؤولتیم، حیاتیمسان.
سنسیز اؤلویم آرتیق یاشامیرام،
بیلیرسن سنسیز نئجه داریخیرام؟
گولمور اوزوم، آغلار گؤزوم، ائی كؤنول
یوخلوغونا نتر دؤزوم ائی كؤنول؟
من آزمیشام ایتیب ایزیم ائی كؤنول
سن نییه یانیمدا یوخسان هارداسان؟
بیلیرسن سنسیز نئجه داریخیرام؟
یازدی بو شعری گؤزلری نملی
گوندوز چوخ فیكیرلی، اورگی قملی.
من مجنون اولموشام سنده‌كی لئیلی
عشقده تك باشیما تنها قالمیشام،
بیلیرسن سنسیز نئجه داریخیرام؟
آرديني اوخو
بو گئجه رؤیاما قوناق گل، گولوم،
منی سئویب - اوخشا، آل آغوشونا.
بو گئجه رؤیاما قوناق گل، گولوم،
حسرتم سسینه، بیر باخیشینا.
بو گئجه رؤیاما قوناق گل، گولوم،
روحونو روحومون یانینا گؤندر.
حیاتدا نه قدر ائتسن ده ظولوم،
باری رؤیامی سن ناغیلا دؤندر.
بو گئجه رؤیاما قوناق گل، گولوم،
حسرت بیر گئجه‌لیك بیتسین رؤیادا.
بیزدن اوزاق اولسون آیریلیق، اؤلوم،
اونلاری گل قویاق اویاق دونیادا.
بو گئجه رؤیاما قوناق گل، گولوم،
سنسیز رؤیالاریم توتقون، قاریشیق.
بو گئجه رؤیاما قوناق گل، گولوم،
بیز كی رؤیالاردا آیریلمامیشیق.
بو گئجه رؤیاما قوناق گل، گولوم،
داها سنسیزلییه دایانمارام من.
بو گئجه رؤیاما قوناق گل، گولوم،
گلسن، سؤز وئریرم: اویانمارام من...
آرديني اوخو
