سن دئییلم كی!
بو گون سنی گؤرموشم ایچینده زر-لیباسین.
اونلارامی ساتمیسان؟ ساخلاییر اورك یاسین.
من قیصاص آلمالییام، سنین یوخدو قیصاصین،
خیانتینی گؤرموشم، دای سئون دئییلم كی،
آجیق وئرردیم سنه هئییف، سن دئییلم كی!
اؤزگه‌سینه گئده‌رك گؤزلریمدن دوشموسن،
سنی تانیمیرام من منیم اوچون اؤلموسن،
یازیق، باشا دوشمه‌دیم - ایبلیسمیسن، گولموسن،
هر شئیی آشكار ائله! بیل دؤنن دئییلم كی،
آجیق وئرردیم سنه هئییف، سن دئییلم كی!
ویجدانینلا تك قالیب خجالت چكمه‌دینمی؟
بو سئوگی‌نین یولوندا گؤز یاشی تؤكمه‌دینمی؟
یادیگار شكیللری دیواردان سؤكمه‌دینمی؟
منه نییه باخیرسان؟ سئوینن دئییلم كی،
آجیق وئرردیم سنه هئییف، سن دئییلم كی!
بونو دئ هئچ اولماسا: نه اوچون آلداتمیسان؟
"ملك" دئدیم ایبلیسسن اؤزونو تانیتمیسان.
داها گلمه گئرییه آرزولار یانیتمیسان.
آیریلدیغیمیز اوچون من اؤلن دئییلم كی،
آجیق وئرردیم سنه هئییف، سن دئییلم كی!
اومودلریم او گوندن سنینله باتدی، گئتدی.
یولدان چكدیم گؤزومو بئله تئز نییه بیتدی،
او ائده‌رك خیانت سئوگیده سونا یئتدی.
سئومیرسن سئومه داها، دیلنن دئییلم كی،
آجیق وئرردیم سنه هئییف، سن دئییلم كی!
هر گون یادا دوشورسن آغریییر اورك نئجه!
چكیلمزدیر حسرتین ایندی هر كئچن گئجه،
بوتون هیسلر سنینله بیلكی چیخیبدیر هئچه،
بیرده سنی دونیادا هئچ گؤرن دئییلم كی،
آجیق وئرردیم سنه هئییف، سن دئییلم كی!
یادیندامی دئیردین منی هئچ واخت بوراخما،
اولاجاغیق بیز خوشبخت گؤزله بیر آز داریخما،
اؤزون سئچدین قیسمتی بئله دالیمجا باخما،
گئری دؤنمز او گونلر من او من دئییلم كی،
آجیق وئرردیم سنه هئییف، سن دئییلم كی!
گؤزلریمله گؤروم
ایستردیم بو سیرلی دونیانی گؤزلریمله گؤروم
بنزه‌ییب مجنونا صحرانی گؤزلریمله گؤروم
ایسته‌مزدیم بیر داها من چكیم عشقین عذابین
آرزومدو بیر دلی سئودانی گؤزلریمله گؤروم
گئجه‌لر یاتمایاندا خیالین قاتیر باشیمی
ایندی بس من نئجه رؤیانی گؤزلریمله گؤروم
وفالی یاریمی هئچ یوخومدا دا گؤرمه‌ییرم
بس نئجه او گؤزو شهلانی گؤزلریمله گؤروم
من بیر بولبول كیمی قفسده هئی چیرپینیرام
یا ربّ آچ قفسی شیطانی گؤزلریمله گؤروم
آغایام، اؤلوب گئتسم قلم اولار باش داشیم
نه، قدر من ساغام میصراعنی گؤزلریمله گؤروم
