گئدیرسنسه گئت
یارالی خسته‌یم یاردیما مؤحتاج،
یاراما ملهه‌مین یوخوندورسا گئت.
قلبیمده آتشلی سئوگی وار، آمما،
بو اوددا یانماقدان قورخورسانسا گئت.
سئویرم سؤیله‌دیم سنی سئونده،
سنینسه سؤزلرین قالیبدیر سنده،
داشدان هئیكل كیمی دورما اؤنومده،
دئیه‌جك بیر سؤزون یوخوندوسا گئت.
گؤزوم یاد باخیشلار گؤرور گؤزونده،
بیلیرم بو گوناه دئییل گؤزونده،
سنین عقیده‌‌نده، سنین اؤزونده،
عهده صداقتین قالماییبسا گئت.
بیز یولا چیخیریق حیات آدیندا،
بو یولدا اولاجاق قار دا، بوراندا،
هله باشلامادان، یولون باشیندا،
بیر آددیم آتمادان یورولدونسا گئت.
بو یولو سونادك گئده‌جه‌یم من،
دوستلاردیر اومیدیم، تك دئییلم من،
دئییرلر ان سوندا اومیددیر اؤلن،
سن منیم اومیدیم دئییلسنسه گئت،
سنه قال دئمیرم، گئدیرسنسه گئت.
