سنسیز یامان داریخمیشام
اورگیمده سوخورلانمیش محبتین ایزلرینی،
باخیشینلا یاشادارسان ایلك عشقیمین بنزرینی،
بو دونیایا دیَیشمه‌رم شفق ساجان گؤزلرینی،
اود آلمیشام صیفتیندن، آخیب سنه قاریشمیشام
سنسیز یامان داریخمیشام!
بیر هارای وار گنجلیگیمده، قویاممیرام اونا بیر آد
گؤر نه‌دندیر؟ عشقیمیزدن عرشه قالخیب ناله،فریاد
بو آیریلیق گونلرینده بیرجه كره اولسایدیق شاد،
دئیه بیلمم، بختی كمم، دردلی-قملی یارانمیشام
سنسیز یامان داریخمیشام!
او گولوشون نه شیریندیر، حسرتینسه یامان جتین
من سویویوب بوزا دؤندوم، قیزدیرارمی هرارتین؟
بیر گیزلیجه، بیر آلوولو، بیر بلالی محبتین
آلوووندا توستوله‌نیب، یانیب-یانیب كول اولموشام
سنسیز یامان داریخمیشام!
ائله بیلمه ساكیت-ساكیت اینیلده‌ین من بیر نئیم،
ائله بیلمه ساجلارینا سیگال جكن بیر كوله‌یم،
اوزاقداسان... خیالینلا یاشاییرام، ائله بیل كی سنینله‌یم
هاردا اولسام سنی هر آن دوشونمه‌یه جالیشمیشام
سنسیز یامان داریخمیشام!
شیرین یوخو
ایلاهی، بیر شیرین یوخو وئر منه،
ائله بیر یوخو كی، بیر عومور یاتیم.
اوچوب آرزولارین قانادلاریندا،
وصال منزیلینه بیر آندا چاتیم.
منه بیر یوخو وئر، یوخو وئر الله،
اینتیظار، گؤز یاشی قیسمت اولماسین.
اوندا سئوگی اولسون، محبت اولسون،
آیریلیق اولماسین، حسرت اولماسین.
ائله بیر یوخو كی، اونون الییله،
فله‌یین جؤورونو ایتیره بیلیم.
منه یوخو وئرسن، واخت دا وئر الله،
گؤردویوم یوخومو بیتیره بیلیم.
حسرت
هارا گئدیر بۇ یوْلون سوْنو بیلمیرم
هارا سۆروكله‌ییر بۇ سئودا بیزی
من سنده اۇزاقدا گؤزلریم یوْلدا
سن ده مندن آیری مندن خبرسیز
خاطیریمدن چێخمیر خیالین بیر آن
قلبیمده سیلینمز ایز بۇراخمیسان
منی آیریلیغین یاندیردی یاخدی
دۆباره اۆستدن حسرتین قدرسیز
سئوگیلیم
سنینله خوش كئچن او گؤروشلری،
عومرومون ان شیرین یوخوسو ساندیم.
سنی تانیدیغیم او گوندن بری،
ائله بیل یوخودان بیردن اویاندیم.
نه شیرین، نه گؤزل بیر رؤیا ایدی،
شیرین صؤحبتلرین، شیرین وصالین.
بو بیر دوستلوق ایدی، یا سئودا ایدی.
ایلیشیب كؤنلومده قالدی خیالین.
منی بو یوخودان اویاتماسینلار،
خیالین كؤنلومدن قوی سیلینمه‌سین.
یاندیرسین قلبیمی بو عشقین اودو،
یاندیرسین، آشكاردا هئچ بیلینمه‌سین.
