من سئودیم اؤزگه‌یه چاتیرسان نییه؟
آیریلدیق آیریلیق ایسته‌مه‌دن من
تك قالدیم توتمادین سن اللریمدن
منی سئودیگینه آند ایچدین دونن
دونه‌نی بو گونه ساتیرسان نییه؟
من سئودیم اؤزگه‌یه چاتیرسان نییه؟
گئجه‌لر یوخوما سسله‌دیم سنی
سمایا بیر گونش ایسته‌دیم سنی
بیر قیزیل گول كیمی بسله‌دیم سنی
ایندی اؤز الیمه باتیرسان نییه؟
من سئودیم اؤزگه‌یه چاتیرسان نییه؟
دومانی بورونوب ازگین صاباحی
یاندیردی قلبیمی آیریلیق آجیسی
آیریلدیق سن منده گؤردون گوناهی
بوینوما بؤهتانی آتیرسان نییه؟
من سئودیم اؤزگه‌یه چاتیرسان نییه؟
قارشیلیقسیز محبت ساچلاریمدا دن
ایندیدن دئییرم اینجیمه مندن
سنسیز ازراییلا قیسمت اولسام من
دئمه بو تورپاقلاردا یاتیرسان نییه؟
من سئودیم اؤزگه‌یه چاتیرسان نییه؟
تانریمی آپاردی، اؤزونمو گئتدین؟
سنسیزم، یالقیزام، تنهایام داها
تانریمی آپاردی، اؤزونمو گئتدین؟!
خبرین اولدومو باتدین گوناها،
تانریمی آپاردی، اؤزونمو گئتدین؟!
...من عشق دلیسییدیم-سئوداسی سندن،
ایندی آیریلیقسان ساچیمدا دن-دن.
سن اؤزون گلمیشدین، چاغیرمادیم من،
تانریمی آپاردی، اؤزونمو گئتدین؟!
...كؤنول، سنه یئندیم، تك سنه بیل، سن،
آیریلیق اؤلومدن بئتردی بیلسن...
ائی، منی تكلییه تاپشیریب گئدن
تانریمی آپاردی، اؤزونمو گئتدین؟!
